REAL MARCIANISE – TARDE = 0 A 1…CU ‘A NAPULE MMANE, ‘U RREJE PERDE! |
L'ha scritt Aldo "Diecipalazzine" | |
domenica 21 settembre 2008 | |
Po’ stè Vittorio Manuéle ca no ss’ha capìte angòre ci è idde ‘u capintèste de le Savoje o ‘u cuggìne sùve Amedeje. Comungue reàle o no rreàle l’ame mìse ind’u panàre. Nuje cuzzàre tarandìne l’ame sckattàte le meròdde cu ‘nu gol de càpe d’u scugnìzze napuletàne. A propò! Pe vvènè a vedè CATURANO (quìste jè ‘u nòme d’u sciucatòre) hònne venùte ‘na trendìne de parijnde da Scampia e l’hònne purtàte furtùne o uagnòne.. abbunesinne. Bràve ‘o purtiére nuèstre NORDI ca n’ha salvàte ‘u cù…. ops… ’a càpe, vuléve dicére. L’arbètre de stavòte se chiamàve LUPO, quìdde d’a vòte scòrse PECORELLI… ma tutt’è ddoje tenevéne le cuèrne… accom’è stù fàtte? Mangàve Cappuccetto Rosso e avèmme completate. ’U prìme tijmbe ame fàtte ‘na bella partìte, o seconde ame accumenzàte a menà pallùne alla capedemenghje e menumàle accòme ‘n’ha sciùte. Honne trasùte MAROLDA, CARROZZA e PAGLIUCA ca se putevéne sta fèrme fèrme addò stavéne e ‘u mègghje in cambe ha stàte GIORGINO ca ‘no jè quìdde d’u teleggiornale cu le recchje a parafanghe, ma ‘u mediane nuèstre ‘nzìste.Beh! Mò ne scè vedìme ‘a prucessjòne d’a ‘Nduluràte cucchje cucchje piccè fàce frijdde… Facitava calà… cucchje cucchje… ehehehe. |