| Má ... cé ‘sse mange osce? |
|
|
|
| L'ha scritt Pepp' Nest' | |
| sabato 21 luglio 2007 | |
|
Ligg'u reste pè sapè ce' se mangia osce... Fuscenne sceve ijndre á cucine e vedeve a mammá cá steve tutta cungegnate mmijenze alle tijste e cu’ ná cucchiare ‘mmane ‘ndrutulave.Bbelle pareve, c’ú sunale cá le parteve da suse alle menne e scenneve fine a sotte alle scenucchije, a radie stave appezzecate e manghe a farle apposte sté sunave ná canzone de’ Claudio Villa … jedde a sté candave pare pare … dicime pure cá a’ candave megghije … ma a fame m’arraggiava a vendre … quacche ccose m’aveva ‘nvendá pé arrecapetá nu’ vuccone. Accome n’artiste d’ú cinematografe, cangive l’espressione, m’azzettive arête aú taule e aspettive ca mammá m’arevulgeve na parola. Troppe tijmbe me facie aspitta’ … nonne puteve cchiú … me pareve ca’ ijndre a’ vendre teneve quaccheccose ca’ se’ sté menave a muezzeche … E quedda … manghe p’a cape … nó ‘mme penzave propre … Dope nu picche me tremendije … l’uecchije tuerve me facerene capije ca’ no’ jeve cose … eppure na’ parola m’a’ dicije: <T’avisse azate apprime … e te mangiave ú latte apprisse alle frate tue!> Mezzeca penzive … pure ijndre aú cervidde me legge questa qquaje … doce doce m’azive da suse a’ segge … e propre mendre sté pigghijave a’ porte cú me ne sceve … me dicije … <Avine aqquá, mangete ste doje pulpette … ma po’ avaste! Ca’ ci nó nonge avastene a’ menzadije.> U’ core mie s’allarió, … cú dóje vuccune spazzulive tutte cose … mentre me’ ste alleccave le muse e le dicete, … dicive … <Má … cé ‘sse mange osce?> Me tremendije sottuecchje e me respunnije … <Brode … ma pó spuelpete l’osse ca’ a’ carne coste assaje!> |
A’ staggione, quanne se rumaneve á cáse , cé vuleve assaje cú mmé ‘nzeppave da suse aú lijtte, … dicime pure ca’ quase quase nonge m’azave propre.| < Vid quidd d'apprim. | Vid 'nnotre. > |
|---|
